Մեկ ամիս առաջ SHAMSHYAN.com-ը ֆոտոռեպորտաժ և տեսանյութ էր հրապարակել Երևանի Նոր Նորք վարչական շրջանի դեռևս շահագործման չհանձնված մանկապարտեզի տարածքում տիրող հակասանիտարական, գարշահոտ վիճակից։
Գյուրջյան փողոցում գործող այդ մանկապարտեզի բակում տեղադրված դիտահորից կեղտաջրերը դուրս էին գալիս ու հասնում մինչև «Սուրբ Գրիգոր Լուսավորիչ» բժշկական կենտրոն, ծննդատուն, Գյուրջյան փողոցին հարակից սննդի և տարբեր տեսակի սպասարկման սրահների մոտով։
Հրապարակումից կարճ ժամանակ անց Երևանի քաղաքապետ Տիգրան Ավինյանի կարգադրությամբ Նոր Նորք վարչական շրջանի ղեկավար Մարատ Սևոյանն ու «Վեոլիա ջուրը» մասամբ հարցը լուծեցին՝ խոստանալով, որ 10 օր բավական է, որպեսզի տենդերը շահած ընկերությունը սկսի աշխատանքներ իրականացնել։
Այսօր՝ օգոստոսի 13-ին, մեկ ամիս անց, նշված հատվածում նույն գարշահոտ հակասանիտարական վիճակն է։
Վարչական շրջանի ղեկավարը շաբաթներ առաջ ֆոտոլրագրողի հետ զրույցում հավաստիացրել էր, թե ինքը հանդիպել է բնակիչներին և խոստացել, որ օրերի հարց է խնդիրը կարգավորելու և գարշահոտ վիճակը վերացնելու գործը։
Սակայն մեկ ամսից ավելի է արդեն, վարչական շրջանի ղեկավարի խոստումները իրականություն չդարձան։
Բնակիչներն էլ այսօր իրենց արդարացի զայրույթն էին ուղղում Երևանի քաղաքապետարանին, «Վեոլիա ջուր»-ին և Նոր Նորքի թաղապետարանին՝ ասելով․ «Ձեր քայլը նման է ամենայն հայոց բանաստեղծ մեծն Թումանյանի «Շունն ու կատուն» ստեղծագործության այն դրվագին, երբ կատուն շանը ասում էր՝ ուրբաթ օրը համեցեք, տար։ Ու քանի ուրբաթ անցավ։
Թաղապետի խոստումն էլ շուն ու կատվի փափախը դարձավ»։
Մանկապարտեզի մոտ հավաքված բնակիչներն ասում էին՝ «Սկզբից հավատացինք, որ թաղապետը մի բան կանի, բայց էս Մասիվի վրա հեղափոխությունից հետո թաղապետ չի գալիս, ամեն մեկը հայտնվում է ինչ-որ խելակորույս պատմությունների մեջ ու հրաժարական տալիս։
Իսկ ներկայիս թաղապետ Մ․ Սևոյանը հավակնում է ստանալ հայտնի «Պահանաջվում է ստախոս» կատակերգության մեջի գտնվող «փչան Թոդորոսի» տիտղոսին»։
Մանրամասները՝ սկզբնաղբյուրում։
