Իրավիճակն այն աստիճանի լարված է, որ ոստիկանությունն անգամ ի զորու չի լինելու կառավարել հանրային տրամադրությունների պայթյունը․ Արտակ Զաքարյան

Փաշինյանի իշխանության կողմից իրագործվող հակապետական քայլերն այն աստիճան են սրված ու ցցուն, որ հանրությունն արդեն ընդդիմադիր ուժերից առավել է տրամադրված ընդդեմ այս իշխանության, ավելին՝ իրավիճակն այն աստիճան լարված է, որ ոստիկանությունն անգամ ի զորու չի լինելու կառավարել հանրային տրամադրությունների պայթյունը, հետևապես, որպեսզի երկիրը քաոսի չվերածվի, անհրաժեշտ է, որ ազգային ընդդիմադիր քաղաքական ուժերը կարողանան առաջնորդել այդ գործընթացը դեպի օրինական ճանապարհով իշխանափոխություն՝ ընդունված միջազգային և իրավական նորմերով։

168 TV-ի «Ռեվյու» հաղորդաշարի եթերում, խոսելով հանրային տրամադրությունների փոփոխությունների մասին, նման տեսակետ է հայտնել Հայաստանի Հանրապետական կուսակցության Գործադիր մարմնի անդամ Արտակ Զաքարյանը։

«Սրանք դեռ իներցիայի ուժով կառավարում են երկիրը. իրենց թվում է՝ իրենք կարողացել են մարսել Արցախի կորուստը, մեր՝ Հայաստանի Հանրապետության խոցելիությունը, սակայն այդպես չէ, ոչինչ էլ չեն մարսել, ոչինչ էլ չեն կարողանալու մարսել, որովհետև դրանք ֆունդամենտալ սխալներ ու դավադիր գործողություններ են, որոնք ականապատել են Հայաստանի Հանրապետության քաղաքական ապագան։ Սրանք վիճակն այնքան են վատացրել, որ նույնիսկ հաջորդ ազգային և պրոֆեսիոնալ իշխանության համար շատ դժվար է լինելու բավարարել մեր ժողովրդի կենսական պահանջմունքները»,- ասել է Արտակ Զաքարյանը՝ ժողովրդին հիշեցնելով՝ Հայաստանում իշխանափոխությունն էականորեն նվազեցնելու է պատերազմի հավանականությունը՝ ի հեճուկս փաշինյանական իշխանության ու նրանց սատարողների այն պնդումների, թե նոր իշխանությունը պատերազմը կբերի Հայաստան։

«Պատերազմը հավանական է այնքան ժամանակ, քանի դեռ Փաշինյանն ու նրա դավաճանության գործակիցներն իշխանություն են»,– ասել է Զաքարյանը։

ՀՀԿ ԳՄ անդամի խոսքով՝ Փաշինյանը չէ, որ պետք է որոշի հայ ժողովրդի ճակատագիրը, ուստի պետք է գնա, քանի որ պարտված է, քանի որ նրա պարագայում անհնար է ունենալ միջազգային երաշխավոր ուժեր՝ մեր անվտանգության համար՝ հատկապես, որ Փաշինյանը Հայաստանի անվտանգությունը հասցրել է զրոյական մակարդակի։

«Հայ ժողովուրդը ստեղծված վիճակում միակ բանը, որ պետք է անի, իշխանության սահուն փոփոխությունն է։ Ւնքն է՛լ ինչ անի, որ ապացուցի՝ գործում է Հայաստանի Հանրապետության շահերի դեմ»,- ասել է Զաքարյանը։

Դիտարկմանը՝ հանրության սպասելիքն առավելապես ընդդիմադիր ուժերից է, Զաքարյանն արձագանքել է՝ դա ճիշտ է, և այստեղ է, որ առողջ ազգային ուժերը պետք է սեղանին դնեն ազգային օրակարգ, հանրությունն էլ պետք է հրաժարվի «նախկինները չլինեն, ով ուզում է՝ լինի» խոսույթից։

«Նախկիններն այս պետության քաղաքական հարստությունն են, լավն են, վատն են, մի բան սխալ են արել, մի բան՝ ճիշտ, միևնույն է, նրանց գործունեությունը պետության համար գոյաբանական սպառնալիքներ չի բերել»,- ասել է Զաքարյանը՝ ընդգծելով՝ այն քաղաքական ուժերը, որոնք առաջ են տանում «ոչ նախկին, ոչ ներկա» խոսույթը և տարածում, գործում են այս իշխանության դաշտում։

«Համախմբում է պետք։ Այո, մենք բոլորին էլ ասելիք ունենք՝ շատ ծանր մեղադրանք, բայց մեզ զսպում ենք՝ հանուն Հայաստանի Հանրապետության»,- ասաց Զաքարյանը։

Կիսվել սոց․ ցանցերում ՝
Megainfo